ه‍.ش. ۱۳۸۶ اسفند ۱۶, پنجشنبه

مزنترین لوٹانءِ دیما برگا گیئشتر اوپار پہ کار إنت۔


مزنترین لوٹانءِ دیما برگا گیئشتر اوپار پہ کار إنت۔
چمشانک: ولید گربنیمن راڈیو بلوچیءِ ویبتاکءَ جی بی إل اوءِ بیانے دیست کہ اودا لھتے إیرانی گلانءِ بلوچ باسکانءِ ھردچاریءِ سرا گلھے کنگ بیتگ أت۔ پدا دگہ بیانے إشیا چہ رند گندگ بیت کہ اودا پہ بلوچ راجءِ مزنترین لوٹءِ دیما برگا گلہ پدا زیرگ بیتگ أت و إختلاف نظرانءِ سرا گپ کنگءِ ضرورت مارگ بیتگ أت۔ پدا دگہ یک بلوچ دوستواھےءَ ھم دست بندی کتگ کہ بلوچ گون وت مان وتی جنگان بلوچ دوشمنان سوب مہ دے أنت۔مزن بلوچستانءِ آزادی لوٹوکین و إے لوٹا دیما برگءِ پلہ مرزی کنوکین بلوچےءِ حیثیتءَ من وت کسانین گلانءِ ڈوبارگءِ خلافایان۔ منی خیال -ھنچوکہ بلوچے گوانکءَ اشارہ کتگ- إے إختلاف بلوچان چہ یکا دگرا دیر بر أنت و دشمنانءِ راہءَ پہ بلوچانءِ ڈوبارگا پچتر کن أنت۔ یک دگہ گپے کہ من گریٹر بلوچستانءِ آزادی لوٹوکان مدام گشتگ و أنگت ھنچو فکر کنان کہ آ چہ حالتاکی بیانان دیماتر بچار أنت۔ خاص ھما وھدی کہ حبر پہ یک ھورین بیانےءَ کیئت، کسانین گلانءِ مجبوریان بہ مار أنت۔ إیران یا پاکستانءِ توکا سیاست کنوکین گلان لھتے مجبوری ھست أنت۔ إے مجبوری آیان مان یک دایرھےءِ توکا بند کن أنت۔ آ چہ إشی در آتک نہ کن أنت۔ گریٹر بلوچستانءِ گپ چہ إشانءِ حدودءَ ڈنءِ گپے إنت۔ أگر آ گون ھنچین گلےءَ نزیک بیگ یا پہ ھر ڈولین کارےءَ ھور گندگ بہ بنت گڑا آیانءِ پروگرامانءِ سرا بازین دست چست بیت إنت و پہ آیان بازین مشکل ودی بیت إنت کہ إے آیانءِ دیمرئی دیما شنک بنت۔گریٹر بلوچستانءِ لوٹ و مراد دگرانءِ دیما شنگ جنگ مہ بیت۔ آ وتی فکرا دیما برگءِ نیمگا گیئشتر خیال گور بہ کنت۔ من ألـّمان؛ وهدے کہ وھدی کیئت،أگر ظاھری ئے دیگ بہ بیت یا دیوان و کنفرانسے کنگ بہ بیت؛ گون شرین منصوبہ بندی و صبر، و اوپار گریٹر بلوچستانءِ نامءَ جی بی إل او اُلسءَ توار پر بہ جنت کس چک پد نہ بیت إنت۔ بیت کنت کہ ھما گل کہ إیرانءِ سیاست و سالمیتءَ منـّوک أنت ھم وتی بلوچ باسکان چہ ھنچین مچّیءِ توکا بھر زیرگا مھن مہ کن أنت یا آیان داشت مہ کن أنت۔ چمشکا جی بی إل او باید وتی عملی کارانءِ دیما برگا گیئشتر وھد به دات۔ ھنچوکہ مان زانگا إنت کہ تنے وھدی جی بی إل اوءِ باسک و پلہ مرزی کنوک عملءَ پیسر پیسر أنت و ھمے برکتا پہ بلوچان أولی ٹلوژن چنلےءِ پچ کنگا ھم سوبین بیتگ أنت؛ دیمترا ھم ھنچین راجی ضرورتانءِ پورا کنگءِ نیمگا گیئشتر کار کن أنت۔إے تمامین حبرانءِ کنگا چہ رند -أگر منی خالءَ کسے بد مہ بارت- لوٹان بہ گشان کہ إنسانان لھتے ھورین مارشت ھست إنت۔ إے خاطرا أگرکسے فکر کنت کہ من ھرچے بہ کنان یا بہ گشان و منا کس ھچ مہ گشیت؛ رد إنت۔ إنسان باید إنت دیمءِ مردمان ھم إنسان بہ منّ أنت و إنسانانءِ وڑا گون آیان پیش کنزان کن أنت۔ أگر نہ گڑا ھر کس یوکا مانیت و مزنترین مقصدان آپء بار إنت۔
مزن بلوچستانءِ آزادیءِ جھد سوبین بات۔
ولید گربنی 6/3/08

هیچ نظری موجود نیست: