ه‍.ش. ۱۳۸۶ اسفند ۵, یکشنبه

مھر نمیران

مھر نمیران

ظلم و زورءِ آماچیں ڈیہ ءَ ،
بے نکانیں بنی آدمانی شھر ءَ ،
آس مانداشتگیں مئے ھلک ءَ ؛
یک برے پدا
وار کتگ دھرءِ جلّاد ءَ ۔
زھم وتی سوھان ،
گوش تیز ،
حکمءِ اشکنگءَ
مزن سیاھپاگءِ
جاتوگیں جبّارءِ ۔
پہ انسانیتءِ کوشءَ ،
عدلءِ پاھو و ایرموشءَ ،
مھر ءِ گاری ءَ ۔

نزان ‏ئے !
مھر زند انت بنی آدمیءِ ،
مھر مارشت انت زندگی ءِ ،
مھر ماتءِ شکّلیں شیر
مھر دوستءِ رکّانی ھیر
مھر ورنائیں نوک سیر ،
مھر ترپوکیں استار
مھر روچءِ رژن ۔

زوراکیءِ سیاھگواتءَ مانشانتگ
پہ رژنءِ تھاریءَ ،
مھر ءِ آوار جنگ و گاری ءَ ۔

بلے بزان !
تا آدمیزاد ءِ جھان ھست ،
مھر تیجار جنت ،
تھم کشیت ، دھل رودینیت ۔

مھر اے کائنات ءَ
چہ ابد بیتگ تا ازل مانیت ؛
مھر نمیران
مھر نمیران

مسکان بلوچ
23/02/08

هیچ نظری موجود نیست: